Yesevi Hikmetlerinde "Zikr"
HİKMET-1 Yetti yaşda Arslan Bâbğa kıldım selâm: "Hak Mustafâ emânetin kılıng inâm" Uşal vaktda ming bir zikrin kıldım tamam Nefsim ölüp lâ-mekânğa aştım mena
Nefsim meni yoldın urup hâr eyledi Telmürtürüb halâyıkka zâr eyledi Zikr aytturmay şeytân birle yâr eyledi Hâzırsın dep nefs başını sançtım mena
HİKMET-2 Rahîm içre peydâ boldum nidâ keldi Zikr ayt dedi azâlarım titrey berdi Ruhum kirdi süngeklerim Allah dedi Ol sebebdin altmış üçde kirdim yerge
Zikrin tamam kılıp öttüm divâneğe Hakdın özge heç sözlemey bigâneğe Şemin izlep şâgird kirdim pervâneğe Ahker bolup küyüp yanıp öçtim mena
Beş yaşımda belim bağlap ta'at kaldım Tatavvu ruze tutup âdet kıldım Keçe kündüz zikrin aytıp râhat kıldım Ol sebebdin altmış üçde kirdim yerge
HİKMET-3 Her subhidem nidâ keldi kulağımda Zikr ayt dedi zikrin aytıp yürdüm mena Işksızlarnı kördüm erse yolda kaldı Ol sebebdin ışk dükânın kurdım mena
Onsekkizde çil-ten birle şarab içtim Zikrin aytıp hâzır turup kögsüm teştim Ruzî kıldı cennet kezip hurlar kuçtım Hak Mustafâ cemallerin kördim mena
On tokkuzda yetmiş makâm zâhir boldı Zikrin aytıp iç ü taşım tâhir boldı Kayda barsam Hızr Babam hâzır boldı Gavsu’l-gıyâs mey içürdi toydum mena
HİKMET-4 Yazuk birle yaşım yetti yigirme beş Sübhân Igem zikr ögretip kögsümni teş Kögsümdeki girihlerim sen özüng yeş Ol sebebdin Hakk'a sığnıp keldim mena
HİKMET-8 Elveda deb yer astıga kadem koydum Yaruğ dünya haram kılıb Hak'nı süydüm Zikrin aytıb yalguz bolub yalguz küydüm Mustafa'ga matem tutub kirdim mena
HİKMET-15 "Fezkürûllah kesiran" dep ayet keldi Zikrin aytıb zari kılıb yürdüm mena Didarını aşıklarga vade kıldı Işk yolıda canım berip yürdüm mena
HİKMET-18 Işkka kadem koyğanlar Hak dîdârın körerler Mûsâ-sıfat mahşerde Hak'dın seval sorarlar Sermest bolup vaslıda Hû zikrini kurarlar Arslan Babam sözlerin işitingiz teberrük
Yetti yaşda Arslan Bâb Türkistanğa keldiler Başım koyup yığladım hâlim körüp küldiler Ming bir zikrin örgetip mihribânlığ kıldılar Arslan Babam sözlerin işitingiz teberrük
HİKMET-19 Cebrail vahiy keltürdi Hak Rasûlğe Ayet keldi zikr etgin deb cüz vü küllğe Hızr babam saldı meni uşbu yolğa Andın songra derya bolub taştım dostlar
HİKMET-20 Sübhân İgem bir katre mey kılsa inâm Zikr-i sırnı ayta ayta kılsam tamam Hur u ğılmân cümle melek anga gulâm Uçmah içre harîr tonlar biçer dostlar
HİKMET-21 "Ente'l-Hâdi Ente'l-Hakk" nı zikrin aytsam Hadi bolsang egri yoldın rastka kaytsam Hû zikrini tilge alıb na'ra tartsam Kolum tutub yolğa salgıl "Ente'l-Hâdi"
"Ente'l-Hâdi Ente'l-Hakk"nı zikri kavi Pîr-i muğan sözleridin alsa fetvi Bâtınları revşen bolup bolur yahşi Kolum tutub yolğa salgıl "Ente'l-Hâdi"
HİKMET-22 Bende bolsang zikrin ayğıl kolung alsun Yoldın azsang rehber bolup yolğa salsun Seherlerde zârı kılğıl rahmi kelsün Kolum tutub yolğa salgıl "Ente'l-Hâdi"
"Ente'l-Hâdi Ente'l-Hakk"nı zikr-i Allah Hakk zikrini ayğıl tınmay bolgung âgâh Rahîm Mevlam nazar kılsa olur nâgâh Kolum tutub yolğa salgıl "Ente'l-Hâdi"
"Ente'l-Hâdi ente'l-Hakk"nı zikri dilde Bilmes nâdân zikrin aytıb zâhir tilde Menmen degen şeyh-i zaman âbu gilde Kolum tutub yolğa salgıl "Ente'l-Hâdi"
"Ente'l-Hâdi Ente'l-Hakk"nı zikri uluğ Hakk zikrini vird eylegen köngli sınuğ Vird eylemey şeyhmen dese câyı tamuğ Kolum tutub yolğa salgıl "Ente'l-Hâdi"
HİKMET-39 Ahmed muradı sensen, zikri-yu yadı sensen İşler küşadı sensen ya Mustafa Muhammed
HİKMET-49 Hak Mustafa bihuş bolup özdin ketdi Cibril kelip Hak Mustafa başın tuttı Subhan İgem kudret birle zikr ögretti Ümmet bolsam men hem zikrin aygum kelür
Kul Hâce Ahmed dünya körseng zinhar kaçgıl Zikrin aytıb tarikatnı yolun açgıl Ayet hadis sözi birle dinar saçgıl Erenlerdin dürr ü gevher algum kelür.
HİKMET-50 Hak visalin tilegenler tün ü küni Tınmay canı birle aytur zikri Hu'nı Hak'dın ilham yetib kelür bilseng munı Ahiretni azukını algum kelür
HİKMET-53 "Fezkürûni" zikrini aytgan kullar daima Cümlesin hemrah behişt-i adn'de kördüm
Tüni küni uhlamay Hu zikrini aytganlar Melâyikler hemrâhı arşnı üstide kördüm
HİKMET-54 Yolğa kirgen erenlerdin yolnı sormay Yığlamay mu ey dostlarım hatâ kıldım Hak zikrini keçe-kündüz vird eylemey Eyâ dostlar öz cânıma cefâ kıldım
Allah aytur "Aşıklarım burâk-suvâr Hak zikrini aytganlarga rahmet yağar Köp yığlağan didarımnı bî-şek körer Rûz-ı mahşer didarımnı âtâ kıldım"
Hakdın korkup mâl u pulnı süymegenni Haknı aytıb bir dem yatıp uymagannı Yatsa kopsa Hak zikrini koymagannı Açtım bâtın közlerini binâ kıldım
HİKMET-56 Kul Hâce Ahmed kulluk içre sâbit bolsam Zikrin aytıp zâkir bolup "Rabbi" desem Zikrinde şevklenib küyüb yansam Bu iş birle yâ Rab seni tapkay mu men?
HİKMET-58 Zâkirleri cem bolub tüzülmişde Zikrü semâ'dın tosunı kurulmışda Boyın ukbâ dünyâsıdın urulmışda Köngil kuşı Hazret tabâ uçtı bolğay
HİKMET-60
Hakk Te'ala pertev saldı canım küydi Keling yığlıng zâkir kullar zikr aytaylık Seher vaktde Pîr-i muğan bakıb sordı Keling yığlıng zâkir kullar zikr aytaylık
Zâkirlerge va'de kıldı Kadir Hüda Gor içinde âtâ kıldı hur u likâ Zâkirlerni turar câyı darül-bekâ Keling yığlıng zâkir kullar zikr aytaylık
Zâkir bolsa, şakir bolsa yeri cennet Kanlar aksa közleridin kılmas minnet Ümmet bolsang zikrin aytmak sizge sünnet Keling yığlıng zâkir kullar zikr aytaylık
Zâkirlerge Hüda özi va'de kıldı "Fezkürûni ezkürküm" ayet keldi Firdevs atlığ cennetidin mahzar keldi Keling yığlıng zâkir kullar zikr aytaylık
Zâkirleri her nefesde zikrin aytar Tevbe kılıb egri yoldın râstga kaytar Zikrin aytsa asta âstâ şevki artar Keling yığlıng zâkir kullar zikr aytaylık
Zâkirleri halka içre pertev körer Anıng üçün halka içre özin urar Ma'şukını körgen zaman canın berer Keling yığlıng zâkir kullar zikr aytaylık
Yalğan âşık ma'şukıdın canın ayar Ukba yolın arka taşlab dünya süyer Hu halkasın kurğan yerdin eyler firar Keling yığlıng zâkir kullar zikr aytaylık
"El kezzâbu la ümmeti" dedi Server Bu sözlerge yol bergüvçi Hâdi rehber Yalğançını ümmet demes ol Peyğamber Keling yığlıng zâkir kullar zikr aytaylık
Rahmân İgem çın âşıknı yolın açar Muhabbetni şevki birle yaşın saçar Allah teyu kayda barsa şeytan kaçar Keling yığlıng zâkir kullar zikr aytaylık
Zâkirleri zikrin aytıb nâle kılur Köz yaşını sarığ yüzge jâle kılur Biyâbanlar kezib özin vâle kılur Keling yığlıng zâkir kullar zikr aytaylık
Zâkir kullar Hakk fermânın mehkem tutar İhlâs birle Allah teyu kanlar yutar Halka içre kirgen vaktde candın öter Keling yığlıng zâkir kullar zikr aytaylık
Bi-tehâret zikr aytğangâ la'net yağar Oşal küni bolğan ferzend şeytan tuğar Öler vaktde evvel kelib şeytan bakar Keling yığlıng zâkir kullar zikr aytaylık
Bî-tehâret zikrin aytgan imân etmes Öler vaktde Hak Mustafa kolın tutmas Sübhan İgem günahını hergiz ötmes Keling yığlıng zâkir kullar zikr aytaylık
Mü'min bolsang bi-tehâret zikrin aytma Kerâmetler aytıb halkga dining satma Müslümanlığ da'va kılıb kâfir ketme Keling yığlıng zâkir kullar zikr aytaylık
Zâkir bolsang zikrin aytmay hergiz yatma Nadân birle nâ-cinslerge hiç söz katma Münâfıklar haldın sorsa bir söz aytma Keling yığlıng zâkir kullar zikr aytaylık
Kul Hâce Ahmed yamanlarnı yamanı sen Barça buğday el tutmagay samânı sen Yoldın azğan gümrâhlarnı nâdânı sen Keling yığlıng zâkir kullar zikr aytaylık
HİKMET-61 Çın âşıklar keçken ermiş cânın taşlap Edhem-sıfat berhem urup mâlın taşlap Hu Hu teyü Hak zikrini aytıp hoşlap İmân tasdik kılıp bağrın kebâb etti
HİKMET-64 Hakk vaslığa yetey deseng zâri kılğıl Zikrin aytıb erenlerge yârı bergil Cefâ tartıb erenlerdin uluş algıl Uluş almay didârını körer mukin?
HİKMET-65 "Yâ Rabbenâ" zikrin aytıb zâkir bolsam Sansız mihnet başga alıb şâkir bolsam Yahşilarnı sohbetide hazır bolsam Miskin bendeng feyz u fütuh alar mukin?
HİKMET-66 Yol astıda aziz başım tufrak kılsam Cân u dilim Hakk yolığa şeydâ kılsam Zikrin aytıb murdar tenim âfak kılsam "Elest" hamrın miskin bendeng içer mukin?
HİKMET-78 Âşık uldur Hakk'a canın kurban kılsa Zikrin aytıb çarzarb urub seher tursa Erenlerdin feyz ü fütuh tola alsa Sultan bolub dürr ü gevher saçar dostlar
HİKMET-79 Yaratkan Bir ü Bar'ım yolın izleb Şeytan la'in yollarıdın kaytıng dostlar İhlas birle muhabbetni camın içip Can u dilde Hayy zikrini aytıng dostlar
Hayy zikrini aytıb içgen cam-ı şarap Yol üstide aziz başı misli turab Allah içün hali harab bağrı kebab Can u dilde Hayy zikrini aytıng dostlar
Astanege başım koyup zari kılsam Halka kurup kim zikr aytsa yarı bersem Zikrin aytıb ol suhbetdin dürler tersem Can u dilde Hayy zikrini aytıng dostlar
Amel kılmay âlim ilmin basıp yürgey Ölüp barsa tar lahedde canı küygey Allah, Rasûl dining kim dep haybet kılgay Can u dilde Hayy zikıini aytıng dostlar
Münker-Nekir "Men rabbük" dep seval kılgay Kâl ilmidin bir nuktası kâr kılmagay Va hasreta amelsizler neçük kılgay Can u dilde Hayy zikrini aytıng dostlar
Allah degen kend u esel peyda kıldı Ahiretde Allah birle sevda kıldı. Amel kılgan çın alimni dânâ kıldı. Can u dilde Hayy zikrini aytıng dostlar
Kalıng çırağ haling pilte yağı yaşıng Neçe aytsam behre almas köngli taşıng Yol üstide tufrak bolsun aziz başıng Can u dilde Hayy zikrini aytıng dostlar
Essiz âlim amel kılmay yolda kalur Okup okmay dünya malın kolga alur Menmenlikdin essiz ömrün zayi kılur Can u dilde hayy zikrini aytıng dostlar
Zâhir buzub bâtın tüze âlim bolsang Ruz-ı mahşer kolung tutgay tangla barsang Va veyleta nedamet dep yolda kalsang Can u dilde Hayy zikrini aytıng dostlar
Âlim uldur namaz okub ta'at kılsa Hak'dın korkub ahiretni gamın yese Kur'an okub Hak'dın korkub zar ingrese Can u dilde Hayy zikrini aytıng dostlar
Andağ âlim ikki közi giryan bolur Seherleri erte kopub nâlân kılur Hak yolıda küyüp yanıb biryan bolur Can u dilde Hayy zikrini aytıng dostlar
Hârlık tartgıl kafr nefsing başı katsun Daim müdam bu dünyadın yığlab ötsün Tufrak bolgıl alem seni basıb ötsün Can u dilde Hayy zikrini aytıng dostlar
Harlık tartıb Hak Mustafa Ümmet dedi Asi cafi ümmetlerin gamın yedi Anıng üçün ümmetleri kuvvet aldı Can u dilde Hayy zikrini aytıng dostlar
Ümmet üçün bağrıda yok zerre bütün Ümmet dese dimağıdın çıker tütün Hak Te'ala kılgay mu dep bizni otun Can u dilde Hayy zikrini aytıng dostlar
Kul Hâce Ahmed alay deseng Hak'dın uluş Bâyezid dek nefsing birle tün kün uruş Ey bihaber ümmet erseng buldur reviş Can u dilde Hayy zikrini aytıng dostlar
HİKMET-82 Keçe kündüz bi-gam yürdüm zikrin aytmay Cehd eyleben tüni küni fikrin etmey Muhabbetni bâzârıda özni satmay Nefsim meni yüz ming taâm tiler dostlar
Eyâ gâfil Hak zikrini tildin koyma Dünyâlıkdın bir zerreni kolğa alma Erenlerni arkasıdın hergiz kalma Yolğa kirgen âhir murâd tapar dostlar
Didâr körey degen kullar bidâr bolur Yürse-tursa, yatsa-kobsa zikrin aytur İçi taşı andağ kulnı nurğa tolur Allah nurın andağ kulğa saçar dostlar
HİKMET-85 Kulmen degen tınmay zikrin aytar Işk otığa bağrı küyüb feryad eter Bîhaberler ömrün bilmey yelge satar Gaflet birle cehennemge keter dostlar
HİKMET-93 Kul Hâce Ahmed sâati bir zerre yok tâatı Zikri cânnı râhatı seher vakti bolğanda
HİKMET-95 "Lailahe illallah" dep zâri kılgıl Hakk zikrini her kim aytsa yarı bargıl Pîr-i muğan hizmetine yügrüp yürgil Hakk cemâlin körsetmese damen bolay
Pîr-i muğan etegini muhkem tutgıl Marifetni bazarıda özüng satgıl Mey nuş etip sema kılıb zikrin aytgıl Hakk cemâlin körsetmese damen bolay
Derd-i halet peydâ kılıb yolğa kirgil Pervane dek şem'ni körüb özüng urgıl Kayda barsang zikrin aytıb dükan kurgıl Hakk cemâlin körsetmese damen bolay
Muhabbetni meydanıda baş ornatsang Hû-Hû teyü zikrin aytıb can kıynasang Didar tileb kan yaş töküb zâr ingreseng Hakk cemâlin körsetmese damen bolay
Ey nâinsaf dünya fâni Hakk'a yanğıl Bende bolsang Hakk zikrini tınmay aytğıl Pîr-i muğan hizmetide cefa tartgıl Hakk cemâlin körsetmese damen bolay
HİKMET-98 Derviş Haknıng manzurı zikri turur gülzârı Haknı yâdı esrârı hub edebliğ dervişler
HİKMET-102 Bul hevesni teni küyse canı küymez Ol sebebdin ışk kadriğe yetib bolmas Erenler sohbetiğe kaçıb kelmez Zikr dua riya kılıb yürür bolğay
HİKMET-103 Cünun içre başın yarğan kanı câri Zikrin aytsa Allah özi Bir ü Barı Seherlerde kan yığlamak kâr u bârı Aşıkları her kün yüz ming gâzi bolğay
HİKMET-108 Keling yığlıng zâkir kullar zikr aytaylık Zâkirlerni Hudâ bî-şek süyer ermiş Işksızlarnı imânı yok ey yârânlar Duzah içre tınmay dâim küyer ermiş
Muhabbetdin haber algan cânnı bilmes Başı ketse tâ yârı yok cânnı bilmes Işk kelâmı zevk taâmı nânnı bilmes "Hu-Hu" teyü zikrin aytıp yürer ermiş
HİKMET-113 Bu Yesevi Miskin Ahmed hayran kalıb "La İlahe İllallah"nı tilge alıb Hak zikrini canu dilge vâsıl kılıb Uç kuşını lâmekânda körer ermiş
HİKMET-114 "Fezkürûni ezkürkum" iştib nidâ Zikrin aytıb emrin tutub müşahedâ Kirib gorga tartıb türlük mücahedâ Âşık canlar sır şarabın içer ermiş
HİKMET-127 Hakk yâdıdın zerre gâfil bolmağanlar Yatsa kopsa Hak zikrini koymağanlar Vallâh-billâh dünyâ harâm almağanlar Gor içinde ol kul hergiz ölmez bolur
HİKMET-128 Uşbu yolğa kadem koyğan candın keçti Zikr-i kalbin ayta ayta köksin teşti Andın songra cânân bakıb eşik açtı Açsa bolmas Pîr hizmetin kılmağunça
HİKMET-130 "Ricalün la tulhihim" deb aytdı Hudâ Oşal merdân mâsivâdın bolur cüda Zikrin aytıb her nefesde olsa revâ Tapar her dem Gavsü'l-ğıyas celâletin
HİKMET-133 Zâkir bolup zikrin aytsa kelgey nidâ Şeytan-la’in yetmiş ferseng bolğay cüdâ Derdi bolsa Hak derdige bergey devâ Andağ kulnı özi izlep cânan kılur
HİKMET-134 Mundağ bolmay Hak vaslığa yetib bolmas Resva bolmay sırdın manâ alıb bolmas Hû zikrini aytıb daim tildin koymaz Vehmi birle dillerini lerzan kılur
HİKMET-137 Tang atkunça zikrin aytkıl canıng birle Tağ u çölnü bostân kılgıl kanıng birle Taşdan kattığ taşka yatkıl yanıng birle Yoldın azğan yüz ming gâfil merdân bolur
Zikrin aytğıl kanlar aksun közleringdin Hikmet aytğıl dürler tamsun sözleringdin Güller unsun her bir baskan izleringdin Gülge baksang gül açılıp bostan bolur
HİKMET-139 Keçe yatmay hâb-ı gaflet harâm kılsa Zikr-i kalb u zikr-i sırnı tamam kılsa Ming bir atın tesbih etip kelâm kılsa Bende ne dep dergâhığa hatâ kılsun
HİKMET-140 Hakk zikrini mağzı cândın çıkarmasang Üç yüz altmış tamurlarıng tebretmeseng Törtyüzkırktört süngeklering kul kılmasang Yalğançıdur Hakk âşık bolğanı yok
HİKMET-143 Behişt aytur: "Men artuk zâkir kullar mende bar Zâkirlerni könglide zikr ü fikr-i Sübhân bar"
HİKMET-146 Aşıkları zikrin aytıb hormas ermiş, Barğan sarı yigit bolur, kormas ermiş. Halka tapsa, âşık işge hormas ermiş, Kehf itidek ârif sangıdın kalmas ermiş.
HİKMET-160 Ruhi halet zikrullah, la ilahe illallah, İsmi a’zam hüvallah, bu halkanıng içinde. Her kimige zevk hale, bolsa bolur bu vale, Sakiy sunar piyale, bu halkanıng içinde.
HİKMET-162 Fikru zikri Hak İgemni senâsıdur, Didar taleb kılıb yürgen gedasıdur, Haknı zikri cümle derdni devasıdur, Dünyalığdın kolga zerre almas bolur.
Kul HocaAhmed, âşık bolsang, zari kılğıl, Halka kurub kim zikr aytsa, yarı bargıl. Zikrin aytıb, suhbet içre dürler tergil, Güher alğan hergiz gâfil bolmas bolur.
HİKMET-165 Işk tecelli kılsa kimni vücudında, Ne kılurın bilmey tün-kün hayran bolur. Zikri fikri Hak visali bolur müdam, Yaş oğlandek ikki közi giryan bolur.
Dünya birle kalmas anı zerre işi, Zikrin aytsa, nurga tolur içi, taşı. Allah degeç, revan bolur közde yaşı, Işk otıda küyüb-yanıb, biryan bolur.
HİKMET-166 Özlerining muradın çın aşıklar tilemes, Mâşukining muradın daim alar tilerler. Kul HocaAhmed, vakıf ol, feyzu rahmet eşigin, Zikru taat vaktide, ferişteler açarlar.
HİKMET-168 Eyâ dostlar, haber berib şeriatdin, Tarikatda Allah yadın aytıng, dostlar Ârif canlar haber berür hakikatdın, Allah teyu Hak zikrini aytıng, dostlar.
Kul Hoca Ahmed, Hak zikrini aysang müdam, Rahmet yağar başıng üzre aled-devam. Erenlerning hizmetide bolsang müdam, Azad kılsa, darus-selâm barur, dostlar.
HİKMET-169 Allah degen bendelerni inayeti, Talebide yürgen bende Hak rahmeti, "Fezkürûni ezkürküm" Hak ayeti, Dem ğanimet, Allah zikrin aytıng, dostlar.
HİKMET-170 Eyâ dostlar, âhir boldı zamanemiz, Heç kalmadı bu dünyada nişanemiz. Haber berdi "aduvven" deb Cananemiz, Allah zikrin tınmay aytıb yürüng, dostlar.
HİKMET-172 Koyğıl dünya fikrini, kılğıl Haknı zikrini, Buzgil şeytan mülkini, zâkir bolğıl her zaman.
HİKMET-175 Mürîdlerin terbiyet, künde yüz min hasiyet, Özlerin çopan sıfat, çopan kılur daima, Halka kurub erenler, Hu zikrini başlasa, Ul Zikriya payğambar hazır bolur daima.
HİKMET-178 Yahşılarnı suhbetide kâim bolsam, Hu-Hu teyu zikrin aytıb daim bolsam. Aşıklardek çarh uruban canım bersem, Dergâhıda Hocam kabul kılar mukin?
HİKMET-180 Erenler uşbu yolda candın keçti, Zikrin aytıb seherlerde bağrın teşti, Cefa tartıb bu dünyanıng zehrin içti, Andağ âşık rahat bilen yeter mukin?
Eyâ dostlar, seherlerde nale kılğıl, Köz yaşıngnı akuzuban jale kılğıl, Hak zikrini aytıb özüng vale kılğıl, Vale kılğan Hak vaslige yeter mukin?
HİKMET-181 Tilim bilen Allah zikrin cariy kılsam, Seher vaktda kobub yığlab zari kılsam. Himmet kılıb keçe-kündüz karı kılsam, Dergâhide Hocam nazar salğay mukin?
Ya Rabbena, yadıng bilen bolsam müdam, Barı ümrüm zikring bilen bolsa tamam. Ruze tutub namaz okub her subh u şam Taleb kılsam hacet reva bolğay mukin?
Kul HocaAhmedni uşbu sözi arzu erür, Arzusığa yetelmeyin kayğu yeyür. Taklid kılıb Hu zikrini aytıb yürür, Hu-Hu desem sahibdilan bolğay mukin?
HİKMET-182 Cehanğa etimad etme, tiling Hak zikridin koyma, Bu dünya ayşını sürme, bolursan namdar emdi.
HİKMET-184 Kul Hoca Ahmed, koyğıl emdi dünya fikrin, Cehd eylegil, tınmay ayğıl Hak’nı zikrin. Hazır bolub öleringni emdi bilgin, Emdi izleb, yâ Rab, seni taparman mu?
HİKMET-188 Kul HocaAhmed, bu dünyada bi-gam ötdüng, Hak’dın korkmay tan atkunça kopub yatdıng. Dünya tileb Hak zikrini taşlab atdıng, "Tubu ileyh" okuy-okuy ölmeyin mü?
HİKMET-194 Mü’min degen bolur daim tefekkürde, Fikr eyleb zikrin aytur uzak tünde, Bolmas menlik bir zerre vücudında, Andağ erni etegini tutmas musan?
HİKMET-201 Hak zikrini ayğanlarnı düşman tutkan, Menlik kılıb yahşılarnı basıb ötgen. Helal-haram farkın kılmay alıb yutkan, Ul fâsıknı dilin ne deb sefa kılsun?
HİKMET-203 Aşıkları özi birle bazar kılur, Câhil kullar mü’min könglin azâr kılur. Gâfillerdin Huda, Rasûl bizâr bolur, Hazır bolub, Hak zikrini ayğum kelür.
HİKMET-204 Âşık bolmay vefa naynı çalsa bolmas, Hazır bolmay Hak zikrini aytsa bolmas. Çeng u rübab sazlarını tüzse bolmas, Sözin tüzüb hamd u senâ aygum kelür.
HİKMET-207 Didar üçün canın fida kıldı erse, Tüni-küni Hak zikrini aydı erse, Kul HocaAhmed, bu gurbetge tüşti erse, Eşiting, dostlar, ölmeslikke imkan bar mu?
HİKMET-210 Eyâ dostlar, tün-kün tınmay zikrin aytıng, Zikrin aytıb kulluğında bolmak kerek. Kulluk kılıb tekbir aytıb suhbet kursa, Herne barı bolsa Hakdın körmek kerek.
Sahralarda çar-zarb urub zikrin başla, Hay u heves, maumenlik yırak taşla. Keçe-kündüz tekbir aytıb tinmey işle, Zikrin aytıb sıdkı birle turmak kerek.
MÜNÂCAT Meni hikmetlerim feri yu kavli Dili könglide bolsa, zikri Mevli
_________________ "Bismillah dep beyan eyley hikmet aytıp Taliblerge dürr ü gevher saçdım mena..."
Hazret-i Pîr-i Türkistan Hoca Ahmed Yesevî [ Qaddesallahu Teala Sırrahul-Azîz ]
|